Poslovne vesti - Makedonija

Лаптопите ги претркаа персоналните компјутери

Врвот во продажбата на компјутери и компјутерска опрема се постигна во 2008 година кога се продадоа околу 100 илјади персонални и преносни компјутери и се оствари обрт од 40 милиони евра.

Четири години подоцна, продажбата на персонални компјутери е драматично намалена, што претставува сериозна закана по финансиската стабилност на голем број ИТ компании. Дистрибутерите на хардверска опрема велат дека лап топите веќе ги замениле персоналните компјутери.

- Со развој на технологиите, безжичниот пристап до интернет, пристапните цени и мобилноста на лаптопите си го направија своето, па така обичните корисници се повеќе се одлучуваат за купување лаптоп пред персонален компјутер - вели Виолета Спасевска, менаџер во АМЦ.

Продажбата на компјутери и на светско ниво драматично паѓа. Светските маркетинг компании трендот го објаснуваат со зголемената продажба на смартфоните и таблет компјутерите кои во моментот ја одржуваат ИТ индустријата во живот. Во првиот квартал од годинава, на светско ниво продажбата на персонални компјутери се намалила за 14%. Во Македонија се уште нема официјални податоци за колку е намалена продажбата.

- Според неформалните податоци од членките за првиот квартал годинава забележан е пад на продажбата на хардвер. Тоа, пред се, се должи на намалената куповна моќ на населението, намалувањето на нарачките од компаниите, како и на увозот од неавторизирани продавачи - вели Илија Стевков, претседател на Комитет за хардвер при МАСИТ.

Експертите велат, таблетите постепено ќе ги потиснуваат од пазарот статичните, но и лап топ компјутерите. На светско ниво се очекува продажбата на персонални компјутери да се намали за 7,6%. Според податоците на ИТ Комората, во 2011 година, целиот ИТ пазар во Македонија тежел 180 милиони долари со проекција да достигне сума од 226 милиони долари во 2016 година.